SAMOTALIS: Marxuum Aadan Maxamed Mirre Waqaf Oo Si Heer Qaran Ah Loogu Aasay Maagaladda Hargeysa

12 January, 2012

Marxuum Aadan Maxamed Mirre Waqaf Oo Si Heer Qaran Ah Loogu Aasay Maagaladda Hargeysa

Marxuum Aadan Maxamed Mirre Waqaf Oo Si Heer Qaran Ah Loogu Aasay Maagaladda Hargeysa

Marxuumka ayaa saaka maydkiisa waxa laga soo rogey Madaarka caalamiga ah ee Egal international airport ee magaaladda Hargeysa, waxana...... Daawo Sawiradda

Hargeysa (GNS)- Waxa maanta si heer qaran ah loogu aasay magaaladda Hargeysa ALLE Naxariitii janno ha ka waraabiyee Marxuum Aadan Maxamed Mirre Waqaf, oo Isniintii Todobaadkan ku geeryooday Cusbitaal ku yaal Dalka Malaysiya ka dib markii Wadankaas loo geeyay xaaladd caafimaad.

Marxuumka ayaa saaka maydkiisa waxa laga soo rogey Madaarka caalamiga ah ee Egal international airport ee magaaladda Hargeysa, waxana Garoonka diyaar ugu ahaa Boqolaal qof oo kala duwan kuwaas oo is kugu jirey Caa’iladdiisa iyo Asxaabta kalla duwan ee heer qaran iyo heer Gobol.

Alle ha u naxriitee Marxuum Waqaf, ayaa waxa isla saakaba lagu aasay Xabaalaha Naaso Hablood ee Magaaladda Hargeysa, waxana aasaka Marxuumka ka soo qayb galay Raxan Wasiiro ah kuwaas oo ay ka mid ahaayeen, Wasiirka Gaashan dhiga, Ganacsiga, Duulitsa Hawadda, Madaxtooyadda, Dib udajinta, Wasiiro kalle, Agaasimayaal, Gudoomiyaha Goloha Wakiiladda, ahna Gudoomiyaha urur Siyaasadeedka WADANI, Gudoomiyaha Xisbiga KULMIYE, Gudoomiyha Xisbiga UCID, Saraakiil sarsare oo ka socdda Xisbiga UDUB, Kuwaas oo ay ka mid ahaayeen Wasiirkii horre ee Arimaha Gudaha C/laahi Cirro, Wasiirkii horre ee Warshadaha Maxamed Salleebaan Weyne, Xildhibaanadda Labadda Golle Qaran, Siyaasyiin, Aqoonyahano iyo boqolaal qof oo kalla duwan.

Taariikhdda marxuumka oo kooban ayaa waxa halkaasi ka soo jeediyay Masuuliyiin kalla duwan ugu horeyn waxa taariikhdda maxrxuumka dul maray Mujaahid Maxamed Kaahin Cabdi, waxana uu sheegay in uu Aadan Mirre Waqaf ahaa nin afgaaban, Hawl kar ah isla markaana jecel wadankiisa, Waxana uu intaas ku daray in ay in badan saaxiibo ahaayeen isla markaana uu ku yaqaanay nin Wanaagsan qaranimaddisana jecel.

Gudoomiyaha Goloha Wakiiladda Somaliland C/raxmaan C/laahi Cirro ii isna ka hadlay aaska marxuumka ayaa sheegay in uu yahay halyeey ka baxay qaranka somlailand, waxana uu ALLE uga barayay in uu janadda ka waraabiyo.

Faysal Cali Waraabe iyo Muuse Biixi Cabdi oo iyana ka warmay taariikhdda marxuumka ayaa sheegay in uu marxuumku ahaa nin wadinyadda jecel isla markaana xil kasta oo loo dhiibay kaga baxay si hufan, waxana ay tilmaameen in uu ahaa nin la jecel yahay.

Madaxweyne ku xigeenkii horre ee Somaliland C/raxmaan Awcali, Gudoomiye kuxigeenka labaad ee xisbiga kulmiye mudane C/raxmaan C/qaadir Faarax iyo Xildhibaan C/raxmaan Maxamed Talyanle oo ka hadlay goobtaasi ayaa intuba waxa ay si isku mid ah ugu dheeraadeen taariikhdda Marxuumka, waxana ay ILAAHAY ugu baryeen in uu naxriitii janno ka waraabiyo ehelkii, qaraabaddii iyo qaranka uu ka baxayna samir iyo iimaan ka siiyo.

Abwaan Maxamed Ibraahim Warsame Hadraawi iyo Qoraaaga Boobe Yuusuf Ducaalle, ayaa iyana sheegay in ay in badan is yaqaaneen Marxuum Aadan Maxamed Mirre Waqaf, waxana ay sheegeen in uu ahaa nin Daacad ah, laguna yaqaanay cibaadda suuban waxana ay si guud ahaana u dul mareen taariikhdda marxuumka iyo xilalkii kala duwanaa ee uu ka soo qabtay gayiga Soomaaliya iyo ta Somaliland labadaba.

Isku soo wadda duuduub oo marxuumka ayaa ifka kaga tagey Shan caruur ah iyo laba xaas, waxana uu xilal kala gadisan ka soo qabtay Maamuladdii kala danbeeyay ee Somaliland isagoo noqday maayarka magaalada Burco, Wasiiru-dawlaha arrimaha gudaha iyo Wasiirka Gaashaan-dhiga ee Xukuumadda Madaxweyne Rayaale.

Sidoo kale, Aadan Maxamed Mire (Waqaf) wuxuu noqday Guddoomiye ku-xigeenka koowaad ee Xisbiga Mucaaradka ah ee UCID, isagoo muddo xilkaas hayay, waxaanu markii dambe noqdey hogaamiyay garab ka go’ay Xisbiga UCID oo ay kuwada jireen Xubno badan oo ka tirsanaa Xisbiga UCID, ALLE ha u naxriisto Marxuum Waqaf, waxa uu ugu danbeyntii sheegay uu ka leexday garabka kalle ee ay isku safka ahaayeen, waxana uu tilmaamay inaanuu la socon labadda garab ee uu u kala qaybsamay xisbiga UCID midna.