SAMOTALIS: Ololaha Doorashada Oo Galay Maalintii Saddexaad Iyo Xisbiga Kulmiye Oo Gobolada Iyo Degmooyinka Ku Soo Bandhigay Taageerayaashiisa

01 November, 2012

Ololaha Doorashada Oo Galay Maalintii Saddexaad Iyo Xisbiga Kulmiye Oo Gobolada Iyo Degmooyinka Ku Soo Bandhigay Taageerayaashiisa

Ololaha Doorashada Oo Galay Maalintii Saddexaad Iyo Xisbiga Kulmiye Oo Gobolada Iyo Degmooyinka Ku Soo Bandhigay Taageerayaashiisa

Fagaarayaasha Magaalooyinka dalka, ayaa waxa buux dhaafiyey Taageerayaal sita Calamada Xisbiga Kulmiye, kuwaas....

Hargeysa (GNS) - Ololaha Doorashada Goleyaasha Deegaanka Somaliland ayaa galay maalintii saddexaad, waxaana maanta Taageerayaashiisa Gobolada iyo Degmooyinka Dalka ku soo bandhigay Taageerayaashiisa Xisbiga talada dalka haya ee Kulmiye.

Fagaarayaasha Magaalooyinka dalka, ayaa waxa buux dhaafiyey Taageerayaal sita calamada xisbiga Kulmiye, kuwaasi qaadayey heeso ay ku amaanayaan xisbiga Kulmiye iyo hogaanka sare ee xisbigaasi.

Caasimada Somaliland ee Hargeysa, ayaa waxa beerta xoriyadda saaka isugu soo baxay kumanaan taageerayaal ah, kuwaasi oo isaga kala yimid guud ahaan degmooyinka Caasimada iyagga oo sita calanka Kulmiye iyo sawirada Musharixiinta u sharaxan golaha deegaanka Hargeysa.

Fagaaraha beerta xoriyadda Hargeysa, ayaa waxa taageerayaasha Kulmiye khudbado uga jeediyay Madaxwayne ku xigeenka Somaliland Cabdiraxmaan Cabdilaahi Ismaaciil (Saylici), Wasiirka Wasaaradda kaluumaysiga iyo xoghayaha Kulmiye Xasan Siciid Yuusuf iyo waliba qaar ka mid ah Musharixiinta Kulmiye uga sharaxan caasimadda Hargeysa.

Madaxwayne ku xigeenka, ayaa taageerayaasha u soo bandhigay waxqabadka xukuumadda Madaxwayne Siilaanyo oo uu sheegay inay fulisay balan-qaadkii xisbigu dadka u qaaday ololihii doorashada, isaga oo tilmaamay inay imikana u balan-qaadayaan inay wax badan qabtaan haddii dadwaynuhu codkooda siiyaan musharixiinta uga tartamaya golayaasha deegaanada dalka.

Wasiirka Wasaaradda Kaluumaysiga Somaliland Cabdilaahi Jaamac Cismaan (Geel-jirre) oo isaguna halkaasi ka jeediyay khudbad taageero doon ah ayaa taageerayaashii Fagaaraha beerta xoriyadda isugu soo baxay u sheegay in xukuumaddu fulisay inta badan balanqaadkii ay oololaha doorashada ku soo gashay, waxaanu ka codsaday inay codkooda siiyaan Musharixiintooda.

Isku soo baxan, waxa iyaguna kalmado ka yidhi Xoghayaha guud ee xisbiga Kulmiye Xasan Siciid Yuusuf iyo Musharixiinta qaarkood, kuwaasi balan-qaaday inay wax ka qaban doonaan dayaca Caasimada ka jira.