14 July, 2011

Mudane Ka Tirsan G/Wakiilada Oo Lagu Eedeeyay Dilal ka Dhacay Laas-caanood oo la waayay

Mudane Ka Tirsan G/Wakiilada Oo Lagu Eedeeyay Dilal ka Dhacay Laas-caanood oo la waayay

Hargeysa (Somaliland.Org)-Xildhibaan Maxamed Axmed Dhakool oo ka mid ah Mudaneyaasha Golaha Wakiilada ee ka soo jeeda Gobolka Sool oo lagu eedeeyay inuu ka dambeeyay dilal iyo falal nabadgelyo darro oo lagu khal khal gelinayo ammaanka magaalada Laascaanood ayaa la yahay meel uu jaan iyo cidhib dhigay. Iyadoo wararka qaar sheegayaan inuu u baxsaday magaalada Muqdisho ee dalka Soomaaliya.

Guddoomiyaha Golaha Wakiilada Somaliland Md. C/Raxmaan Maxamed Cabdilaahi (Cirro) oo wax laga weydiiyay eedaha Xildhibaankaasi ayaa ka gaabsaday arrintaasi waxase uu sheegay inuu Xildhibaankaasi uu fasax ka qaatay shirgudoonka Aqalkaasi.

"Xildhibaan Maxamed Axmed Dhakool oo ka tirsan Mudaneyaasha Golaha Wakiilada Somaliland Xildhibaankaasi waxa uu Shirgudoonka u soo qortay codsi fasax ah waxaana la fasaxay illaa 31-ka bishan July 2011-ka,"ayuu yidhi Md. C/Raxmaan Cirro oo caawa u waramayay Telefishanka Horn Cable.

Guddoomiyaha oo la weydiiyay waxa ka jira in Xildhibaankaasi uu ku sugan yahay magaalada Muqdisho ee dalka Soomaaliya waxa uu yidhi "Xildhibaanku fasax ayuu qaatay meel uu ku sugan yahayna kama warmi karo."

Guddoomiyaha wakiiladda oo la weydiiyay inuu ka war hayo eedo loo jeediyo Xildhibaan Dhakool oo ku saabsan inuu ka dambeeyay dilal iyo falal nabadgelyo darro oo lagu khal-khalinayo magaalada Laascaanood waxa uu sheegay inaanay dacwad noocaas ahi soo gaadhin.

Xildhibaankan oo ka soo jeeda xisbiga mucaaridka ah ee UDUB waxa uu Golahaasi ku jiray dhawr iyo toban sano.

Weriye Cumar Maxamed Faarax
Somaliland.Org/Hargeysa
cumarmfaarax@hotmail.com


No comments: