Xukuumadda Somaliland oo Cambaaraysay Wargeyska "Geeska Afrika"

HARGEISA, 24 November 2009 (Somalilandpress) – Wargeyska Geeska Africa waxa indhawayd uu caadaystay in bogiisa hore uu ku soo qoro warar been ah oo dhaawac iyo dhibaato weynba u geysan kara Qaranimada Somaliland.

Waxana ka mid ah maqaaladaasi kii maanta oo taariikhdu tahay 24/11/09 cadadkiisa 813 uu ku baahiyey bogiisa hore kaasi oo uu ku tilmaamay kaalmada dawlada Masaaridu ay u soo dirayso shacbiga Somaliland caawimo cad-quudheed ah, taasi oo meel ka dhac ku ah xidhiidhka fiican ee u dhexeeya labada shacbi ee Somaliland iyo Masaarida.

Waxaynu ka warqabnaa xidhiidhka soo jireenka ah ee labada shacbi Somaliland iyo Masaarida u dhexeeya iyadoo illaa hada dalkeena ay joogaan macalimiin Masaari ah oo caruurteena wax barta. Xukuumada Somaliland-na waxa ay gacmo furan ku soo dhawaynaysaa cid Allaale cidii waxtar iyo kaalmo u fidaniysa shacbiga Somaliland.

Waxa kale oo iyana xusid mudan maqaalkii beenta ahaa ee bogiisa hore Geeska Africa uu ku soo qoray markii dawlada Sucuudigu ay ka qaaday cunaqabatayntii dhoofka xoolaheena. Dhacdadaasi cunaqabataynta ee Sucuudigu ka qaaday xoolaheena, waxa uu wargeysku ku tilmaamay mid been ah oo afka baarkiisa ah, taas oo wajigabax ku riday wargeyska iyo qorayaashiisaba, markii arritaasi ay dhabowday dhoofkii xoolahana loo bilaabay dalkaasi Sucuudi Carabiya.

Haddaba hadalada noocaas ah ee lagu baahinayo wargeys sheeganaya in uu ka soo baxo kuna abtirsado Somaliland miyaanay ahayn Qaran dumisnimo iyo qorayaasha baahinaya wararka nuucaas ah in ay hayso aqoondaro, jaahilnimo iyo mas'uuliyad darro aanay dareensanayn waxyeelada ay u geysanayaa qaranimada Somaliland iyo shacbigoodaba.

Waxa an cidna ka qarsoonayn oo lawada ogyahay dulqaadka xukuumada Somaliland ay had iyo jeer muujiso inaanay wax talaabo ah ka qaadin dadka maqaalada nuucaas ah baahiya iyadoo sharciga lala tiigsado waddamada kalee Adduunka oo ay ka mid yihiin dalalka aynu jaarnka nahay haddii wariyayaashu ay ku kacaan dhacdooyin nuucaas ah.

Gebagebadiina waxan kula talinaynaa wargeyska Geeska Africa iyo kuwa kale ee dalka ka soo baxaba inay ka waantoobaan maqaalada fidno abuurka ah ee waxyeelada u geysan kara qaranimada dalka iyo danta shacibagaba.

Allaa Mahad Leh

Siciid Cadaani mooge
Afhayeenak Madax-weynaha JSL.

SomalilandPress