25 Dawladaha Reer Galbeedka ah oo Leh Calaamado Sita Astaan Diineed

25 Dawladaha Reer Galbeedka ah oo Leh Calaamado Sita Astaan Diineed

"Hay'ado caan ah, naadiyo caalamiya iyo shirkado adduunka aad looga yaqaan ayaa astaan ka dhigtay calaamado tilmaamay diinta ay haystaan"

"Aqoonyahannada waddamada Islaamka ee wax ku soo bartay reer galbeedku waxay ka dayriyaan astaamaha diinta ee ka muuqda calamada waddamadooda oo ay ku tilmaamaan inay waxyeellayn karaan xidhiidhka ay la leeyihiin reer galbeedka"

Diyaarintii: Cabdillaahi Beershiya- Jamhuuriya

Hargeysa (Jam)- Marar badan waxa warbaahinta laga maqlaa aqoonyahanno reer galbeed ah oo dhaleecaynaya calamadda iyo astaamaha qaar ka mid ah dawladaha Islaamka ee ay ku xardhan yihiin ereyo muujinaya in dalkaasi yahay Islaam, taas oo ay ku tilmaamaan inay tahay wax u eg xagjirnimo iyo in dawladahaasi yihiin kuwo Islaami ah oo sida ay u yaqaanaan ah qaar ay ka muuqato xagjirnimo, dadkeedana ku qasbaysa arrimaha diinta.

Sidoo kale waxa jira dad badan oo u dhashay waddamada Islaamka oo aamisan in calaamadaha diinta ee ka muuqda calamada dawladaha Islaamku yihiin qaar wax u dhimaya xidhiidhka ka dhexeeya waddamada reer galbeedka iyo dalalka Islaamka, isla markaana loo baahan yahay in meesha laga saaro wax kasta oo loo malayn karo inay yihiin astaamo diineed.

Waddamo badan oo adduunka ka mid ah oo aan ahayn dawlado Islaam ah ayaa leh calamo muujinaya astaamo diineed oo ah diinta ay haystaan. Sidoo kale waxa jira shirkado waaweyn oo dunida laga isticmaalo qalabka ay soo saaraan oo iyaga laftoodu calaamad ka dhigta diinta ay rumaysan yihiin, sidoo kalena waxa jira ururro iyo hay'ado adduunka caan ka ah oo astaantoodu tahay calaamad diimeed.

Marka la isbarbar dhigo dawladaha reer galbeedka ee calamadoodu leeyihiin astaamaha diineed iyo dawladaha Islaamka ee calamadoodu leeyihin astaamaha diineed waxa tiro badan dawladaha reer galbeedka, taas oo macnaheedu yahay in hadday dawladaha Islaamku ka mid yihiin kuwa laga awoodda badan yahay aanay isticmaali karin wax calaamad ah oo muujinaya astaamaha diinta ay haystaan, hadday ku dhaqmaan arrimahaas oo kalena waxa ka muuqda calaamadihii argagixisada iyo xag-jirnimada. annaga oo ah dawladaha waaweyna waxa noo banaan wax kasta oo aanu doono.

Haddaba, haddii aynu tusaale u soo qaadano waddamada reer galbeedka ee calankooda ka muuqato astaan tilmaamaysa diinta ay haystaan oo kiristan ah wey tiro badan yihiin waxana ka mid ah, Georgia, Finland, Switzerland, Sweden, Iceland, Australia, Denmark, Malta iyo England.

Dhinaca kale, naadiyada ciyaaraha ee ugu caansan adduunka, ayaa iyaga laftoodu waxay leeyihiin astaamo muujinaya diinta ay aamisan yihiin dadka leh kooxahaas, waxaynuna tusaale u soo qaadan karnaa kuwan soo socda: Real Madrid, Barcelona, AC Milan iyo Liverpool, kuwaas oo dhammaantood lagu arko calamadda iyo astaamaha ay leeyihiin waxyaabo amma calaamadda saliibka oo tilmaamaysa diinta kiristanka. Sidoo kale waxa jira hay'ado badan oo kuwa samafalka ah oo leh astaamo muujinaya kiristaannimo amma diinta ay haystaan.