Wasaaradda Maaliyada oo si weyn kor Ugu Qaaday Dakhliga Kastamada Dalka

Wasaaradda Maaliyada oo si weyn kor Ugu Qaaday Dakhliga Kastamada Dalka

Hargeysa  – Dakhliga guud ee kastamada Jamhuuriyadda Somaliland, ayaa kor u kacay in ku dhaw boqolkiiba konton toddobadii bilood ee ugu horreeyey ee sannadkan 2011 marka la barbar dhigo sannadkii hore ee 2010. Sida ku cad qoraal uu soo saaray agaasimaha kastamada Somaliland, Cali Axmed Maxamed laga soo bilaabo bishii January ilaa bishii Julay 2011, ayaa waxa kordhay adduun ku dhaw 150 bilyan oo shilinka Somaliland, taasi oo ka noqonaysa korodh dhan 46.4% marka loo eego sannadkii 2010 isla bilihii January ilaa July. Labadaasi muddo faraqa korodh ee u dhexeeya dakhliga ayaa waxa uu qoraalku muujinayaa in ay soo baxday lacag korodh ah oo ka badan 63 bilyan oo Shillinka Somliland ah.

qoraalkan oo shabakada wararka ee Somaliland.Org ay nuqul ka mid ah heshay waxa lagu sheegay in todobadii bilood ee u horeeyay sanadkii 2010-kii ay 16 kastam oo dalka ku yaala ka soo xarootay lacag dhan 137,351,539,039 sl shilin, halka todobadii bilood ee u horaysay ee sanadkan 2011 ay ka soo xeeroodeen kastamadaasi lacag dhan 201,111,672,363 sl shilin. waxa farqiga labadaasi xisaabood u dhaxeeyaa uu noqonayaa 63,760,133,324 sl shilin.

Korodhkan ku dhaw 50%, waxa uu muujinayaa in aanay waxba ka jirin wararkii sheegayay in uu hoos u dhacay dakhligii dalku, balse uu kordhay labanlaab, iyada oo aanay jirin wax cashuur ah oo la kordhiyay.
Tallaabadan, ayaa guul u ah xukuumaddan sanad jirka ah ee uu madaxweynaha ka yahay Axmed Maxamed Maxamuud (Siilaanyo), waxanay muujinaysaa guusha ay wasaaradda maaliyaddu ka gaadhay in ay kordhiso dakhli cashuureedka qaranka.